عشر حاجات تتعلمها من السينما المصرية مش هتشوفها في أي مكان تاني
- الفدائي دايمًا لما بيعمل عملية انتحارية ويهرب من الإنجليز ويدخل مكان يستخبى فلازم يتجوز واحدة من اللي ساكنين في المكان دا.
- الفدائي غالبًا بيهرب لكباريه والرقاصة بتخبيه من الإنجليز.
- الرقاصات أيام الاحتلال كانوا شطار في التمريض أكتر من دكاترة اليومين دول، الرقاصة بتاخد الفدائي معاها البيت عشان تداوي الجرح وتطلع الرصاصة من جسمه.
- لما الفدائي يدخل بيت الرقاصة بتحلف له إنه عمر ما حد دخل البيت الطاهر دا قبله، وإنها رقاصة آه لكن شريفة.
- الرقاصات هم اللي حرورا مصر من الإنجليز ومفيش واحدة شريفة كان لها أي دور في الموضوع.
- الرقاصة هي أشرف واحدة في العالم، ولولا الظروف كانت طلعت دكتورة، ومش من حقك تنتقدها أو تتهمها بحاجة، لكن الشيخ أبو دقن أكيد منافق، ومايغركش منظره والجلابية والسبحة، دي عدة النصب.
- كل عساكر الإنجليز اسمهم جوني، وكل ضباط البوليس السياسي (الأمن الوطني حاليًا) اسمهم صفوت، وتقريبًا كنت عشان تطلع ابنك ظابط مش لازم تعلمه حاجة، سميه صفوت ومالكش دعوة.
- بعيد عن الفدائيين، لما الراجل بيدي لمراته العصمة في فيلم عربي فدا معناه إنه مايقدرش يطلقها، ولما بيزهق منها بيترجاها ترمي عليه اليمين.
- كل المصريين بيشربوا خمرة يا عاطف، ومفيش بيت محترم مفيهوش بار صغير في الريسبشن.
- لما الواحد يحب يخرج مراته في أي ليلة ياخدها عند حماته أو يروحوا كباريه، وماتفهمنيش غلط، في مصر حسب السينما الكباريه مش عيب، والست عادي بتسيب جوزها يتفرج ع الرقاصة، المهم ما يتجوزش عليها حتى لو الجواز حلال والكباريه حرام.
- المغنواتي دايمًا طيب وشهم وابن بلد، ولو الباشا رفض يجوزه بنته عشان مش معاه فلوس يفتح بيت فالباشا دا أكيد ابن جزمة، وفي آخر الفيلم هيطلع عين أمه لما المغنواتي يبقى غني.
- المعركة بين الحق والباطل ساعة ونص، ولو المخرج غلس تبقى ساعتين، وبتنتهي بانتصار المغني والرقاصة، انتصار الحق يعني.
- إحنا انتصرنا في الحرب عشان مادلين طبر قلعت هدومها للظابط الإسرائيلي وجابت معلومات خطيرة للمخابرات عن إيلات، يعني المايوهات هي اللي خلتنا أقوى جهاز مخابرات في العالم.
- المصريين ما كان لهم أي دور في الثورة، ولا عمرهم عملوا حاجة في البلد، نادية الجندي لوحدها هي اللي شالت الليلة.
هم 14 حاجة، لكن العنوان بتاع ال top 10 دا جذاب أكتر :D
