هل حقًا مافيش صاحب يتصاحب؟

خلينا نتفق إن الناس اللي بتكتب كلام من نوع "مافيش صاحب يتصاحب" هم نفسهم اللي ماينفعش تصاحبهم، مش معقول يعني كل الناس واطية وحضرتك اللي صاحب صاحبك، أكيد أصحابك بينفضولك عشان واطي وقليل الأصل، ومش بعيد تلاقيهم بيقولوا عنك نفس الكلام وفاكرين نفسهم أولاد سليم اللبانين.

واحد من الناس المشهورة في التنمية البشرية اسمه جيم رون بيقول ما معناه إن "ثروتك وسعادتك ومكانتك الاجتماعية هي متوسط ثروات وسعادة ومكانة أكتر 5 أشخاص بتقضي معاهم وقتك"، ولو طبقنا فكرة رون على الرجولة والأخلاق، ولو قلنا إن أقرب 5 أصحاب لك - حسب كلامك أنت - أندال ومعدومي الرجولة ودايمًا بيبيعوك عند الشدة، فبالتالي أخلاقك ورجولتك أنت مش هتبعد كتير عن أخلاقهم، يعني - حسابيًا - الأندال مابيصاحبوش إلا ندل زيهم.

أما اللي بيقولوا إن 2016 كانت سنة زبالة وهيكسروا وراها قلة، فدول في الغالب ناس فقرية مش وش خير، وبيعيدوا نفس الإفيهات في أواخر ديسمبر من كل سنة، ماهو مش ممكن سنة بحالها تعدي ماتشوفش فيها يوم واحد حلو، دا انت تبقى فقري بجد وتستاهل اللي يجرالك، سيبك بقى من البوست اللي عجبك على فيسبوك بيعدد كوارث 2016 ومن ضمنها انتخاب ترامب رئيسًا لأمريكا، إنت مال أمك مين يبقى رئيس لأمريكا أصلًا؟ (بصوت شوبير)، حضرتك المفروض لك حياة خاصة مش هتتأثر بكل حاجة بتحصل في كوكب الأرض، يعني السيول اللي غرّقت آسيا و العواصف اللي حرقت غابات الأمازون ماتخصش معاليك في حاجة، عيش حياتك الطبيعية وبلاش تبقى إنسان افتراضي أوي كدا، ماتزيطش في الزيطة وخلاص، مش لازم كل حاجة يكتبوها في صفحات فيسبوك الحمضانة تبقى أسلوب حياتك وتتأثر بيها وتعيش جو الصعبانيات دا، مش طالباك، كفاية الأصحاب العرة اللي حوالينا، اللي مافيهمش واحد يتصاحب. جتكم الأرف مليتوا البلد.

اقرأ أيضًا عن الناس اللي قرفانين من عيشتهم